ИГІЛІК ЖУРНАЛЫНА ЖАЗЫЛУ
Республикалық жанұялық “Игілік” журналының тұрақты оқырмандары, жазылымшылары және тілшілері мен өкілдері басылымның 10 жылдық мерейтойында “Қазақстан Ұстазы” қоғамының марапаттарына ұсынылады! Сұрақтар бойынша редакция телефоны: +7 778 976 00 10 2016 жылға жазылым АҚ “Қазпошта” арқылы жүргізілуі керек!!! Журналға жазылу туралы Журналға жазылу туралы 6 айға жазылу: облыс – 1956.78 тг., қала – 1984.44 тг., аудан, ауыл – 2006.16 тг., 12 айға жазылу: облыс – 3913.56 тг., қала – 3968.88 тг., аудан, ауыл – 4012.32 тг.

АСАНӘЛІ ӘШІМОВ, КСРО Халық әртісі:

— «Игіліктің» ісі әрдайым игілікті болсын. Журнал қазір жақсы қарқында келе жатыр. Дегенмен қозғалыс болуы керек. Жаймашуақ болғаны жақсы, әрине. Бірақ та уақыт өткен сайын жаңалық қосып, оқырмандарын көбейтетін алымды дүниелер жазыла берсін. Бізде басылымның түр-түрі шығып жатыр. Олардың көптігі жақсы, дегенмен сапа жағын да ойлау керек. Ел-жұрт шет елдің басылымдарын іздеп оқиды, осының себебін ұққан қазақ басылымдары шындықты шырылдатып жазуды үйренулері керек. Баспасөз деген елдің көзі, құлағы, үні, сондықтан да баспаны жеке байлық деп қарамай, елдің байлығы, рухани азығы деп санаулары керек. Сонда ғана қозғалыс болады. Ел жаппай қазақ газет-журналдарын іздеп оқитын болса, міне жетістік деген осы болады!

«Игілік» журналына деген тілегіміз дұрыс, ұнатып оқимыз. «Игілік» журналының 5 жылдығы 10 жылға, 20 жылға, 100 жылға ұлассын!

ӘДІБАЙ ТАБЫЛДЫ, Ақын, жазушы:

— «Игілік» журналының игілікті жұмыстары өте көп: журнал ұлттық тәрбие жүйесін негіздеді. «Әдеп әліппесі», «Ұлттық болмыс», «Адам және қоғам», «Отбасы мәселесі», «Иман әлемі», «Ақ тілекті аналар әлемі» т.б.с.с. айдарларының көкейге қонымды әсерлі, ойға оралымды дүниелері қазақ ұлтының халықтық педагогикасының асылдарын теріп оқырманды ойландырады, тәрбиелейді.

Айшықты айдарларымен берілген мазмұны мәнді шығармаларды оқу орындарында тәрбие жүйесіне жан-жақты пайдалануға әбден болады.

Оқу-ағарту жүйесіндегі өзекті мәселелерді сөз етіп, түрлі пікір қозғайды. Жалпы журналды оқушылардың басы — билікте болуы қажет. Ол қажеттіліктер өтелсе, оқу-ағарту ісіне журналдың қосар үлесі мол.

Журналдың көркемдігі, безендірілуі, тілі оқырмандардың ойынан шығып, басылымның бағасын арттырып тұр. Осындай игілікті тірлікті шыңына жеткізе орындап, көпшілікке толассыз рухани сыйлық ұсынып отырған «Игілік» журналының басшысы, біздің сүйікті қызымыз — Меруерт Әбдірайымқызы басқарып отырған редакция ұжымына аталық ақ батамды беремін. Істерің сәтті болсын, балаларым!

ЕСКЕНДІР ХАСАНҒАЛИЕВ, ҚР Халық әртісі:

— Біз отбасымызбен 5 жылдан бері «Игілік» журналының тұрақты оқырманымыз. Үйімізге ай сайын келіп тұратын басылымды сүйіп оқимыз және әрбір санын жинап қоямыз. Үймізге келген қонақтар да ұнатып қолдарына қыстыра кетеді. Өйткені журналдың іші мәнді-мағыналы, сапасы да өзгеше. Журналдағы әрбір мақаланы жалықпай оқып шығасың. Әсіресе, жеке тұлғалар туралы очерктері өте жақсы жазылады. Осы журналды оқып отырып әртүрі танымал адамдардың өзгеше бір қасиеттерін байқап, танып жатамыз. Мұның өзі тілшілердің тәжірибесін, редактордың іскерлігі мен біліктілігін бірден байқатады. 5 жыл деген бір басылым үшін үлкен жол, кішкентай мерей той болғанымен атқарған еңбектері үлкен. Ылғи да қадамы жақсы болсын және жылдан-жылға жетістіктерге жете берсін. Барлық жақсылық пен сәттіліктерді тілейміз. Оқырмандар мен редакция арасында рухани махаббат орнасын. «Игілік» журналын оқитын әрбір шаңырақта махаббат пен татулықтың тұрақтары даусыз. Дәйім солай болғай!

СҰЛУШАШ ТӨЛЕУХАНҚЫЗЫ, Алматы қаласы Балалардың құқықтарын қорғау департаментінің директоры:

— «Игілік» журналының ұжымын 5 жылдық мерейтойымен шын жүректен құттықтаймын!

Асқақ адамгершілік пен ізгі ниетке, ғылым мен білімге, мәдениет пен өнерге жетелейтін «Игілік» журналы Республикамыздың оқырмандарына қалтқысыз қызмет етіп, тәлім-тәрбиесі мол істердің басы-қасында болып, ұлттық болмысымыздың қайнар көзі, парасаттылық пен тектіліктің бастауы — отбасынан басталатындығын жаңғырта насихаттап, ел үшін қызмет ететін азаматтардың игілікке толы істері мен игі жетістіктерінен ұзақ жылдар бойы хабардар ете беретініне сеніміміз мол.

Қол жеткен жетістіктер, әсте, межелі белес болмаса керек. Алдағы уақыттарда да талай-талай мақсаттарыңыз орындалып, талап биіктерінен көріне берулеріңізге тілектеспін

БИБІГҮЛ ДӘУЛЕТБЕКҚЫЗЫ, теле-жүргізуші, продюсер:

— Жалпы «Игілік» журналын сонау 2005 жылдан бері жақсы білемін. Басылымның қандай белестерден өтіп келе жатқандығы да оқырман ретінде көз алдымызда келеді. Негізінде жекеменшік басылымдар көптеп ашылып жатқандарымен олардың нарық көшіне ілесе алмай жабылып жатқандары да жетерлік. Осындай кезде еліміздегі қазақ баспасөзінің жағдайы жүрегіңе қаяу салады. Дегенмен нарықтың заңдылығын бағындырып, талапшыл заманнан сүрінбей, жыл сайын жаңаша қырымен тынылып, өз оқырманын жинап, халықтың көңілінен шығып жатқан қазақ баспасөзіне разы боламын.

«Игілік» журналының құрылтайшысы әрі Бас редакторы — Меруерт Әбдірайымқызын қаламы қарымды әрі өте іскер де білікті басшы ретінде қатты құрметтеймін. «Аялы алақан» бағдарламасының қайырымдылық шараларына бірнеше рет көмек қолын ұсынған «Игілік» журналының ұжымына да айтар алғысым шексіз.

Елдің алғысына лайықты «Игілік» журналының әлі де жаңарып, жандана түсетіндігіне де толықтай сенімдімін әрі қазақ баспасөзінің тарихына қосар үлесінің салмақты болуына тілектеспін.

БАЙСАҚОВА ЗУЛЬФИЯ, Қазақстандағы Дағдарыстық орталықтар одағының заңды тұлғалар бірлестігінің төрайымы:

— Қадірлі Меруерт Әбдірайымқызы және редакция ұжымы!

Сіздердің ұйымдастыруларыңызбен жарыққа шығып келе жатқан «Игілік» журналының шығармашылық жетістігіне бәріміз де куә болып келеміз. «Игілік» журналының әрбір жетістігін еліміздегі журналистика саласына қосылған жетістік деуге әбден болады. 5 жылдың ішінде редакция ұжымының көптеген игілікті шаралары елдің назарында болды. Халықтың игілігі үшін тынбай ізденіп, шығармашылықтарын шыңдап келе жатқан ұжымға табыс тілеймін.