Аталық Бисен Әлмұханұлы 1948 жылы маусым айының 5- жұлдызында қазіргі Индер ауданы Жарсуат округіне қарасты Қызылжар ауылында дүниеге келген. 1955 жылы алғаш Елтай селосындағы білім ордасының босағасын аттап, 1966 жылы М.Сиранов атындағы ора мектепті бітірген. Сол жылы Гурьев пединститутының тарих факультетіне оқуға қабылданып, (қазіргі Х.Досмұхамедов атындағы Атырау мемлекеттік университеті) 1970 жылы «тарих және құқық пәндерінің мұғалімі» мамандығы бойынша оқып, «тарих және құқық пәндерінің мұғалімі» біліктілігі берілген.
Студент кезінен ғылыми жұмысқа бейімділігін көрсетіп, 1968 жылы Мәскеу қаласындағы М.В.Ломоносов атындағы университеттің базасында өткен Халықаралық дүниежүзі студенттерінің ғылыми-теориялық конференциясында «Сарайшықта жүргізілген археологиялық қазбаның нәтижесі» атты баяндама жасап, Құрмет грамотасымен марапатталған.
Институт қабырғасында студенттердің ғылыми конференциясында жасаған баяндамалары екі жыл қатарынан республикаға ұсынылып, институт ректорының ақшалай сыйлығы мен Қазақстан комсомолы және ВЛКСМ Орталық Комитетінің Құрмет грамоталары берілген.
Алғашқы ұстаздық еңбек жолы 1970 жылы басталып, 2011 жылы құрметті еңбек демалысына шыққан. Ширек ғасырға жуық Индер ауданындағы М.Мөңкеұлы және Махамбет атындағы орта мектептерді басқарып, аудан мен облыстық бюро, кеңес атқару комитеті және білім бөлімдерінің ауыспалы тулары мен жүлделерін бірнеше жыл қатарынан иеленген. Мектепті басқарудағы үлгілі шығармашылық жұмысы үшін облыс әкімінде қабылданып, тәжірибесі туралы Қазақ телевизиясы мен «Егемен Қазақстан» газеті бет арнап жариялаған.
1991 жылы Білім министрінің бұйрығымен Атырау университетінде тарих мамандығы бойынша Мемлекеттік емтихан комиссиясының төрағасы болған. Бірнеше рет облыстық «Жаңа технологиялар» мен панорамалық сабақтар беру, педагогикалық оқу, байқау – сайыстарға қатысып, бәрінде де алғашқы орындар иеленіп, шәкірті И.М.Есқалиева «Мұраттану жөніндегі ізденістерім» атты ғылыми жобаны қорғауда ІІ — орын, республикалық тест сынағынан І – орын алған. Екі мектепте де ұжым басшысы ретінде тәжірибелері облыс, республика бойынша таратылып, бірнеше рет байқаудан «Үздік мектеп директоры» жүлдесін алып, «Үлгілі — тірек мектебі» ретінде мектептің базасында білім басшыларының бірнеше рет облыстық семинарлары ұйымдастырылған. 2007 жылы пән мұғалімі Б.Аталықтың жетекшілігімен мектепте тарихи-өлкетану мұражайы жасақталып, оның ашылуына қатысқан аудан әкімі мен облыстық мәдениет басқармасының басшысы жоғары баға берген. Сол мұражай 2012 жылы мамыр айының 2-жұлдызынан бастап «М.Өтемісұлы әдеби-мемориалдық мұражайына» айналып, қосымша штаттар беріліп, өзі биылға дейін мұражайда ғылыми қызметкер болып істеген. Өткен жылы «Өлкетану оқулары» атты Халықаралық байқау жарияланған еді.Талабы жоғары ұйымдастыру алқасына жіберген Б.Аталықтың баяндамасы ғылыми жинаққа еніп, Өскемен қаласындағы Шығыс Қазақстан мемлекеттік университетінің базасында өткен конференцияға шақырту алған.
2015 жылы қыркүйек айында ЮНЕСКО – ның 70 жылдығына арналған Алматыдағы Абай атындағы Қазақ Ұлттық педагогикалық университетінің базасында өткен Халықаралық конференцияда Б.Аталықтың «Махамбеттің зерттелмеген қырлары туралы» баяндамасына ғалымдар жоғары баға беріп, жинаққа енгізілді, Қазір аудандағы М.Мөңкеұлы мен Махамбет атындағы орта мектептер және аудандық білім бөлімі ардагерлер ұйымдарының төрағасы болып қоғамдық жұмыс істеп, шығармашылықпен айналысуда.
Баспадан «Өмір белестері», «Ерте солған қызғалдақ», «Махамбет атындағы орта мектеп» (Атырау облысы, Индер ауданы), кеңшарды 20 жылға жуық басқарған «Халықтар достығы» орденінің иегері, «Қазақ КСР-нің еңбек сіңірген ауылшаруашылық қызметкері» М.Бақтығалиевтің қиындық пен қызыққа толы өмірі мен еңбек жолдары бейнеленген «Қызылқоғадан шыққан қайраткер» т.б кітаптары шықты.
Бұл кітаптар туралы БАҚ-тарда көптеген мақалалар жарияланып, оқырмандар жылы қабылдады. 1988 жылы мектептің алдына Алматылық сәулетші Әйнековтың жобасымен Махамбет ескерткіші салынуына ұйытқы болған. Жоғары категориялы ұстаз, шәкірттері бар. Соның бірі Х.Досмұхамедов атындағы Атырау мемлекеттік университеті Қазақстан тарихы кафедрасының меңгерушісі, PhD докторы Хамидуллина Динара.
Б.Аталықтың ұзақ жылғы ұстаздық еңбегі лайықты бағаланып Білім министрінің Құрмет грамоталары мен Алғыс хаттарын, «Махамбет» жүлдесі мен «ҚР-сының білім беру ісінің үздігі» және «Индер ауданының Құрметті азаматы» атақтарын иеленген.